വിക്കിവിക്കി കൗശല്‍-കത്രീന കെയ്ഫ് വിവാഹം ഇന്ന് ;സംപ്രേക്ഷണവകാശം വിറ്റത് 80 കോടിക്ക്?
ആരാധകര്‍ ഏറെനാളായി കാത്തിരിക്കുന്ന വിവാഹമാണ് ബോളിവുഡ് താരജോഡികളായ വിക്കി കൗശല്‍-കത്രീന കെയ്ഫിന്‍റേത്. ജയ്പൂരിലാണ് വിവാഹചടങ്ങുകള്‍ നടക്കുന്നത്. 7 ന് ആരംഭിച്ച് രണ്ട് ദിവസങ്ങളിലായി നടക്കുന്ന ആഘോഷങ്ങള്‍ക്കൊടുവില്‍ ഇന്ന് വ്യാഴ്ചയാണ് വിവാഹചടങ്ങ് നടക്കുന്നത് .ഫോര്‍ട്ട് ബര്‍വാരയിലെ സിക്സ് സെന്‍സസ് റിസോര്‍ട്ടില്‍ വച്ചാണ് ആരാധകര്‍ ഏറെ കാത്തിരിക്കുന്ന താര വിവാഹം.
വിവാഹച്ചടങ്ങുകളുടെ സംപ്രേക്ഷണാവകാശം ആമസോൺ പ്രൈം വിഡിയോ സ്വന്തമാക്കിയതായി ദേശീയമാധ്യമങ്ങൾ റിപ്പോർട്ട് ചെയ്യുന്നു. എൺപത് കോടി രൂപയ്ക്കാണ് ഇരുവരുടെയും വിവാഹവിഡിയോയുടെ ഒടിടി റൈറ്റ്സ് വിറ്റുപോയത്. 2022 തുടക്കത്തിൽ വിവാഹവിഡിയോ റിലീസ് ചെയ്യാനാണ് തീരുമാനം.2019 ൽ പ്രിയങ്ക ചോപ്ര–നിക്ക് ജൊനാസ് വിവാഹവിഡിയോയുടെ സംപ്രേക്ഷണാവകാശവും വൻ തുകയ്ക്കായിരുന്നു അമേരിക്കൻ ചാനൽ സ്വന്തമാക്കിയത്.
ചടങ്ങുകളെല്ലാം രഹസ്യമായി നടത്താനാണ് വിക്കി–കത്രീന ജോഡികളുടെ തീരുമാനം. നേരത്തേ നല്‍കിയിരിക്കുന്ന രഹസ്യകോഡുമായി മാത്രമേ വിവാഹ സ്ഥലത്തേക്ക് അതിഥികള്‍ക്ക് എത്തിച്ചേരാന്‍ സാധിക്കൂ.ഈ രഹസ്യകോഡ് പുറത്തു പറയില്ലെന്ന ഉടമ്പടിയിലും അതിഥികള്‍ ഒപ്പുവയ്ക്കണം. റിസോര്‍ട്ടിനുള്ളിലേക്ക് ഫോണ്‍ കൊണ്ടുപോവാനോ ഫോട്ടോ എടുക്കാനോ പാടുള്ളതല്ല.ഏഴ് വെള്ള കുതിരകള്‍ക്കൊപ്പമായിരിക്കും വരന്‍ വിവാഹവേദിയിലേക്കെത്തുക.
ബോളിവുഡ് താരങ്ങൾ ഉൾപ്പടെ ആകെ 120 പേർക്ക് മാത്രമാണ് ക്ഷണമുള്ളത്. ഷാറൂഖ് ഖാനും കബീര്‍ ഖാനുമൊക്കെ വിവാഹച്ചടങ്ങില്‍ പങ്കെടുക്കാനെത്തുമെന്നും റിപ്പോര്‍ട്ടുകള്‍ പറയുന്നു.
