പെൺകുട്ടിയുടെ പെരുമാറ്റ ദൂഷ്യത്തിന് മറുപടി കൊടുത്ത് കുരങ്ങന്‍; വീഡിയോ കാണാം
കുരങ്ങുകളെ പാർപ്പിച്ചിരിക്കുന്ന സ്ഥലത്തെത്തി അവയെ ശല്യപ്പെടുത്താൻ നോക്കുകയായിരുന്നു പെൺകുട്ടി. അവസാനം ദേഷ്യം വന്ന ഒരു സ്പൈഡർ മങ്കി അവളുടെ മുടി പിടിച്ച് വലിച്ചു. ഒരു വിധത്തിലാണ് അവൾ അവിടെ നിന്നും രക്ഷപ്പെട്ടത്.
മെക്സിക്കോയിലെ ഒരു മൃഗശാലയിലാണ് സംഭവം നടന്നത്. ഇതിന്റെ വീഡിയോ സമൂഹ മാധ്യമങ്ങളില്‍ പ്രചരിച്ചുകഴിഞ്ഞു. വീഡിയോയിൽ ഒരു കയ്യിൽ ഫോണുമായി യുവതി കുരങ്ങനെ പാർപ്പിച്ചിരിക്കുന്ന കൂടിന്റെ അടുത്തേക്ക് പോകുന്നത് കാണാം. അതേ സമയം തന്നെ അവൾ മറ്റേ കൈകൊണ്ട് അതിന്റെ കമ്പിവേലിയിൽ ശക്തമായി അടിക്കുന്നുമുണ്ട്.
അവസാനം ഇതിൽ സഹികെട്ട ഒരു കുരങ്ങൻ ദേഷ്യത്തോടെ വന്ന് അവളുടെ മുടിയിൽ പിടിച്ച് വലിക്കുകയാണ്. ചുറ്റും കൂടി നിന്ന ആളുകൾ ടവ്വലും മറ്റും വീശി അതിനെ ഓടിക്കാൻ ശ്രമിക്കുന്നതും വീഡിയോയിൽ കാണാം. ഒരുവിധത്തിൽ പെൺകുട്ടി അവിടെ നിന്നും രക്ഷപ്പെട്ടു. എന്നാൽ, അവിടം കൊണ്ടും തീർന്നില്ല. അത് കഴിഞ്ഞും അവൾ വീണ്ടും കുരങ്ങനെ പാർപ്പിച്ചിരിക്കുന്ന കൂടിന് തൊട്ടടുത്ത് കൂടി പോകുന്നത് കാണാം. വീണ്ടും കുരങ്ങൻ അവളുടെ മുടി പിടിച്ച് വലിക്കാൻ വരുന്നുണ്ട്. അവിടെ നിന്നും വീണ്ടും വല്ല വിധേനയും പെൺകുട്ടി രക്ഷപ്പെട്ട് പോവുകയാണ്.
