ഇതാ മറുപടി; റെയിലിന് മീതെ പറക്കുന്ന ഇൻഡിഗോ വിമാനം, ചിത്രം വൈറൽ
ഫെയ്സ്ബുക്ക് പേജിൽ പങ്കുവെച്ച ഇൻഡിഗോയുടെ പുതിയ ചിത്രം വൈറലാകുന്നു. റെയിൽവേ ട്രാക്കിന് മുകളിൽ പറക്കുന്ന ഇൻഡിഗോ വിമാനം നോക്കി നിൽക്കുന്ന പെൺകുട്ടിയുടെ ചിത്രമാണ് കമ്പനി പങ്കുവെച്ചിരിക്കുന്നത്. ഈ ഒറ്റ ചിത്രത്തിലൂടെ ഉയരുന്ന പരിഹാസങ്ങൾക്കും വിമർശനങ്ങൾക്കും എല്ലാത്തിനും ഇപ്പോൾ ഇൻഡിഗോ വിമാനക്കമ്പനി മറുപടി നൽകിയിരിക്കുകയാണ്.
മുഖ്യമന്ത്രിക്കെതിരെ പ്രതിഷേധവുമായെത്തിയ യൂത്ത്കോൺഗ്രസ്സ് പ്രവർത്തകരെ വിമാനത്തിനുള്ളിൽ വച്ച് നേരിട്ട ഇ പി ജയരാജന് ഇൻഡിഗോ വിമാനം യാത്രാവിലക്ക് ഏർപ്പെടുത്തിയിരുന്നു. മൂന്നാഴ്ച്ചത്തേയ്ക്കാണ് യാത്രാവിലക്ക് ഏർപ്പെടുത്തിയത്. പിന്നാലെ ഇൻഡിഗോ കമ്പനിക്കെതിരെ സൈബർ സഖാക്കൾ ട്രോളുകളും പരിഹാസവും ബഹിഷ്‌കരണ ആഹ്വാനവുമായി എത്തി. ഇത്തരത്തിൽ ട്രോളുകൾ ഉയരുന്നതിനിടെ തങ്ങളുടെ ഫെയ്സ്ബുക്ക് പേജിൽ പങ്കുവെച്ച ഇൻഡിഗോയുടെ പുതിയ ചിത്രം വൈറലാകുന്നു.
ലോകത്തിന് മുകളിലങ്ങനെ പറക്കുക എന്ന ക്യാപ്ഷനോട് കൂടിയാണ് ചിത്രം പങ്കുവെച്ചത്. യാത്രാ വിലക്ക് ഏർപ്പെടുത്തിയതിന് പിന്നാലെ നടന്നു പോയാലും അവരുടെ വിമാനങ്ങളിൽ കയറില്ലെന്നായിരുന്നു ജയരാജൻ പ്രതികരിച്ചത്. ഇതിനൊക്കെ മറുപടിയുമായാണ് ഇൻഡിഗോ എത്തിയിരിക്കുന്നത്.
കഴിഞ്ഞ ദിവസം തിരുവനന്തപുരത്ത് നിന്ന് കണ്ണൂരിലേക്ക് ഇൻഡിഗോ വിമാനത്തിൽ ടിക്കറ്റ് ഉണ്ടായിരുന്നിട്ടും അത് ക്യാൻസൽ ചെയ്ത് ട്രെയിനിലായിരുന്നു ഇ. പി ജയരാജൻ കുടുംബത്തോടൊപ്പം യാത്രചെയ്തത്. തിരുവനന്തപുരത്തുനിന്ന് ട്രെയിനിൽ കയറവേ, കെ- റെയിൽ വന്നാൽ ഇൻഡിഗോയുടെ ‘ആപ്പീസ് പൂട്ടുമെന്ന്’ ഇ.പി ജയരാജൻ പ്രതികരിച്ചിരുന്നു.
