രാജ്യാന്തര ചലച്ചിത്രമേള(ഐഎഫ്എഫ്ഐ) വീട്ടിലിരുന്ന് കാണാം രജിസ്ട്രേഷന് തുടരുന്നു
ഐഎഫ്എഫ്ഐയുടെ പുതിയ എഡിഷന്‍ കാണാന്‍ ഗോവയിലെ ഫെസ്റ്റിവല്‍ വേദിയിൽ എത്താൻ കഴിയാത്തവർക്ക് വീട്ടിലിരുന്നും ഇന്റർനെറ്റ് കണക്ഷനുള്ള ഡിജിറ്റല്‍ ഉപകരണങ്ങളിലൂടെ ഫെസ്റ്റിവല്‍ കാണാന്‍ കഴിയുന്ന വെര്‍ച്വല്‍ മാതൃകയ്ക്കുള്ള രജിസ്ട്രേഷന് തുടരുന്നു. 52-ാമത് ഐഎഫ്എഫ്ഐ ഈ മാസം 20 മുതല്‍ 28 വരെയാണ് നടക്കുന്നത്
കാര്‍ലോസ് സോറ സംവിധാനം ചെയ്‍ത സ്‍പാനിഷ് മ്യൂസിക്കല്‍ ഡ്രാമ ചിത്രം ‘ദ് കിംഗ് ഓഫ് ഓള്‍ ദ് വേള്‍ഡ്’ ആണ് ഐഎഫ്എഫ്ഐയുടെ ഉദ്‍ഘാടന ചിത്രം.
ഡെലിഗേറ്റ്, വിദ്യാര്‍ഥികള്‍, മാധ്യമപ്രവര്‍ത്തകര്‍ എന്നിങ്ങനെ മൂന്ന് വിഭാഗങ്ങളിലായാണ് വെര്‍ച്വല്‍ രജിസ്ട്രേഷന് നടക്കുന്നത്. ഇതില്‍ വിദ്യാര്‍ഥികള്‍ക്കും മാധ്യമപ്രവര്‍ത്തകര്‍ക്കും വെര്‍ച്വല്‍ ഫെസ്റ്റിവലില്‍ സൗജന്യമായി പങ്കെടുക്കാം. സാധാരണ ഡെലിഗേറ്റുകള്‍ക്ക് 200 രൂപയാണ് (18 % ജിഎസ്‍ടി കൂടാതെ) രജിസ്ട്രേഷനുള്ള ഫീസ്. ഓണ്‍ലൈന്‍ പ്ലാറ്റ്‍ഫോമില്‍ പ്രദര്‍ശിപ്പിക്കുന്ന സിനിമകള്‍ക്കൊപ്പം ഉദ്‍ഘാടന, സമാപന ചടങ്ങുകളും മാസ്റ്റര്‍ ക്ലാസ്, ഇന്‍ കോണ്‍വര്‍സേഷന്‍ എന്നീ പരിപാടികളും വെര്‍ച്വല്‍ മാതൃകയില്‍ രജിസ്റ്റര്‍ ചെയ്യുന്നവര്‍ക്ക് കാണാവുന്നതാണ്.
