ആദ്യദിനങ്ങളില്‍ കോബ്രയ്ക്ക് റെക്കോര്‍ഡ് കളക്ഷന്‍
മൂന്ന് വര്‍ഷത്തിനു ശേഷം തിയറ്ററുകളിലെത്തുന്ന വിക്രം ചിത്രം കോബ്രയെ ആരാധകർ ആവേശത്തോടെയാണ് എതിരേറ്റത്. ലോകമെമ്പാടും 120 കോടി രൂപയാണ് കോബ്ര നേടിയതെന്ന് ട്രേഡ് അനലിസ്റ്റ് മനോബാല വിജയബാലൻ പറഞ്ഞു..
കേരളത്തില്‍ നിന്ന് ചിത്രം ആദ്യദിനം നേടിയത് 1.25 കോടിയാണെന്നാണ് റിപ്പോര്‍ട്ടുകള്‍. ബീസ്റ്റും വിക്രവും കഴിഞ്ഞാല്‍ ഈ വര്‍ഷം തമിഴ് ചിത്രത്തിന് കേരളത്തില്‍ ലഭിക്കുന്ന ഏറ്റവും മികച്ച ഓപണിംഗ് ആണിത്. തമിഴ്നാട്ടില്‍ നിന്ന് റിലീസ് ദിനത്തില്‍ ചിത്രം 12 കോടി നേടിയതായി ട്രാക്കര്‍മാരെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്‍ട്ട് ചെയ്യുന്നു. തമിഴ്നാട്ടില്‍ ഈ വര്‍ഷത്തെ തമിഴ് റിലീസുകളിലെ ടോപ്പ് 5 ഓപണിംഗുകളിലും ചിത്രം ഇടംപിടിച്ചു എന്നാണ് റിപ്പോര്‍ട്ട്.
അജയ് ജ്ഞാനമുത്തു സംവിധാനം ചെയ്ത് വിക്രം നായകനായ ‘കോബ്ര’ വലിയ പ്രതീക്ഷകളുമായാണ് എത്തിയത്. എ. ആര്‍ റഹ്‌മാന്‍ ആണ് ‘കോബ്ര’യുടെ സംഗീത സംവിധാനം നിര്‍വഹിച്ചിരിക്കുന്നത്. പാ. വിജയുടെ വരികള്‍ക്ക് ഗാനമാലപിച്ചിരിക്കുന്നത് വാഗു മാസനാണ്. ശ്രീനിധി ഷെട്ടിയാണ് ചിത്രത്തിലെ നായിക. കെ എസ് രവികുമാര്‍, ആനന്ദ്രാജ്, റോബോ ശങ്കര്‍, മിയ ജോര്‍ജ്, മൃണാളിനീ രവി, മീനാക്ഷി ഗോവിന്ദ്രാജന്‍ തുടങ്ങിയവരും ചിത്രത്തില്‍ അഭിനയിക്കുന്നു.
ക്രിക്കറ്റ് താരം ഇര്‍ഫാന്‍ പഠാന്റെ അരങ്ങേറ്റ ചിത്രമെന്ന സവിശേഷതയും കോബ്രക്കുണ്ട് . മലയാളത്തില്‍ നിന്ന് റോഷന്‍ മാത്യുവും മിയ ജോര്‍ജും ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു.
