കണ്ണിൽ പൊടിവീണാല് എങ്ങനെ നീക്കാം?
കണ്ണു തുറന്നു പിടിച്ച് ശുദ്ധമായ വെള്ളം കൊണ്ട് കഴുകുന്നതാണ് പൊടിയോ കരടോ പ്രാണികളോ പെട്ടാൽ ഏറ്റവും ആദ്യം ചെയ്യേണ്ട കാര്യം.
ശുദ്ധമായ വെള്ളമാണോ എന്നു പ്രത്യേകം ശ്രദ്ധിക്കണം. കണ്ണിന്റെ വെളുത്ത ഭാഗത്താണ് പൊടി പെട്ടതെങ്കിൽ വൃത്തിയുള്ള തൂവാല കൊണ്ട് പതിയെ തൊട്ട് നീക്കാം. കഴുകിയിട്ടും പൊടി പോയില്ലെങ്കിൽ മാത്രമേ ഇതു ചെയ്യാവൂ. ഒരിക്കലും കൈ കൊണ്ട് കണ്ണിൽ തൊടരുത്.
കൃഷ്ണമണിയിലാണ് പൊടി പറ്റിയതെങ്കിൽ ഇങ്ങനെ ചെയ്യുന്നത് അപകടമാണ്. കൃഷ്ണമണിക്ക് പെട്ടെന്ന് ക്ഷതം സംഭവിക്കാം എന്നതാണ് കാരണം. കൃഷ്ണമണിയിലെ കരട് മാറ്റാൻ ഡോക്ടറുടെ സഹായം തേടുക. കണ്ണിൽ രക്തം പൊടിഞ്ഞിട്ടുണ്ടെങ്കിൽ ഒരിക്കലും സ്വയം ചികിത്സ ചെയ്യരുത്.
കണ്ണിനുള്ളിൽ ഉറുമ്പാണ് പെട്ടെതെങ്കിലും സ്വയം എടുക്കരുത്. ഉറുമ്പ് കണ്ണിനകത്ത് കടിച്ചിരിക്കുകയാണെങ്കിൽ സ്വയമെടുക്കുമ്പോൾ രണ്ടായി മുറിഞ്ഞു പോകാം. പല്ലുള്ള മുൻഭാഗം കണ്ണിൽത്തന്നെ പറ്റിയിരിക്കുന്നത് അണുബാധയുണ്ടാക്കും..
